و انا معاك

وانا معاك بنسى نفسي
وبنسى روحي وياك ...
وانا معاك بتحلى الدنيا برؤياك
وابقى نفسي اعيش العمر كله معاك ...

و اتمنى أشوف الدنيا بكل حاجة فيها
على هواك ....
وتبقى سعادتي ملهاش حل بقربك
ودفاك ....
حبيبي خلتني اعيش كل ثانية بدوب
في هواك....
وكل ذكرياتنا الحلوة بحاول اعدها
عشان ما انساش احلى ايام قضتها معاك ....
اعذرني لو قصرت في يوم معاك
او قلت كلمة في ساعة غضب مني ليك
ما جاتش على هواك ....
لكن انا عارفة قد اية حبك ليه وغلاوتي
عندك ومكانتي جوة قلبك هناك ....
يبقى تيجي بسرعة بقى عشان انا جعانة
وعايزة اتعشى معاك ....
بقلمي

الولد

آه ع الولد بيقولوا عليه لما جبته ضهري اتشد واتفرد أصلي
لما جبت البت قالوا عليه أم البنات
أصلك وشكل خلفتك كلها ها تبقى بنات
مع ان البنت هي سند ابوها للممات
وضحكتها وطلتها بألف ولد م الولاد
ولما بتقعي ما تلاقيش غير البنات
تشيلك وتحطك وتأكلك وتحن عليكي
حتى في مماتك ها تغسلك وتكفنك
وتدعي ليكي بالرحمة أصل الحكاية مش حكاية ولد ﻷ دي حكاية تخلف شعب انهم يفرقوا بين البنات والولاد مع انهم لو فكروا شوية ها يلاقوا ان الام والاخت والزوجة والحبيبة والغالية هي البنت اللي بعشر ولاد .....
بقلمي

توهنا

توهنا وتاهت دروبنا
لا عارفين فين طريقنا
ولا عارفين نحدد ظروفنا
كلنا ماشيين ماشيين على
حرف نهر من طين
انت وحظك يا تنزل في المية وتسبح
يا تبقى وقعتك سودة وتغرق في
الطين ....
بقلمي

مش مهم

مش مهم ...
مش مهم انت مين والا
ابن مين ...
المهم قلبك ابيض ومهما اتشد بيرجع
يلين ...
مش مهم بتعمل ايه قصدك اية المهم
نيتك للناس وشكرهم والا لرب العالمين ...
بقلمي

كلام عليك

كلهم قالولي عليك بس ما سمعتش منك
قالولي خلي بالك منه وماتخليهوش يغيب عنك
اسمعيله واصغيله وطبيليله عشان ما يضعش منك
اضحكي في وشه
احزني لحزنه
وافرحي لفرحه
بس بعد ما سمعت رديت وقولت
أنا كلي ملكه وفدا قلبه وعقله
وقبل ما يرمش بكون تحت امره و
قبل ما يطلب بلبي
وقبل ما يعتب عليه بوضح واحكي
لا يزعل مني واقعد اهري وابكي 
بقلمي

بحبك

بحبك وانت على بالي
بحبك ومستنيك تقولهالي
بحبك يا اللي ف بالي وانت مش داري
آه بحبك بس شكلي ف اﻵخر هااااا ألبك 
بقلمي

بساطة ورقة

بساطتها
وضحكتها
وطلت عينيها
كلها شدتني
جذبتني
خدتني لبعيد قوي ورمتني
لايام حلوة عدت كانت فيها البساطة عنوانا
والطيبة اساس كيانا
الله على حلاوة ايامنا
اللي راحت واخدت كل احلامنا 
بقلمي

يا ذات الرداء اﻷحمر

يا ذات الرداء اﻷحمر
يا من سكن حبك قلبي
ولطالما طيفك راود عقلي
اسقيتي قطتك من حنانك
وعطفك وامتنانك
فجودي علي
يا ذات الرداء اﻷحمر
بطلتك
بضحكتك
بصوتك الرنان
ببسمتك للعاشق الولهان
لا تمرضيني بحبك الفتان
لا تمنعي دلالاك عني ﻹنسان ضعيف
في حبك غلبان
ارجوكي حني على العاشق المتيم
قبل أن يصيبة الجنان 😢😢
بقلمي

انت

انت حبي
انت عشقي
انت نور عينيه
كل ما احاول اوصفك
ياخدني شعوري لحته تانية
كل حرف من حروفك عشت فيه و
كل همس من شفايفك دوبت فيه
أصلك انت كيانك انت ليه لوحدي
الله عليك .
بقلمي 

ما بلاش

ما بلاش
توعد
وتخلف
ما بلاش
تكدب
وتعند
ما بلاش
تقسى
وتبعد
حاول مرة تشوف
عيوبك
حاول تمسح دموع
خدودك
افرح اضحك
عيش حياه
انسى اعشق
شوف هواك
هي دي ايوة الحياه 
بقلمي 

السكوت والا الكلام

السكوت والا الكلام
لو كان السكوت مش نافع يبقى مفيش غير الكلام
طب الكلام لو جارح يبقى السكوت هو التمام .
بقلمي

تعب الحال

تعب الحال مني والا أنا اللي تعبت
الكل زعلان مني بس والله انا اللي تعبت.
بقلمي

أصعب....

أصعب بكاء البكاء من غير دموع
أصعب سفر السفر اللي ما منوش رجوع
أصعب احساس احساس الظلم من الغريب
أصعب موقف هو موت الحب ف قلب الحبيب 
بقلمي

ما كانش

ما كانش الواحد متخيل انه ها يجي اليوم عليه ولما يشوف حد كان يعرفه ما يقمش يسلم عليه
اصل الدنيا يا صاحبي دايرة
يوم ليك ويوم عليه 😁😁😁
بقلمي